Lög Félags íslenskra gullsmiða
1. gr.
Félagið heitir Félag íslenskra gullsmiða. Starfssvið þess er
allt landið. Lögheimili þess er í Reykjavík.
2. gr.
Tilgangur félagsins er að efla samheldni meðal gullsmiða á
Íslandi, að koma í veg fyrir að réttur þeirra sé fyrir borð borinn
og að stuðla að öllu því, er til framfara horfir í iðninni.
3. gr.
Stjórn félagsins skipa: formaður, varaformaður, ritari, gjaldkeri
og einn meðstjórnandi. Skulu stjórnarmeðlimir kosnir
til eins árs í senn, ásamt tveimur varamönnum. Kosning
skal vera leynileg. Varamenn hafa seturétt á stjórnarfundum
með tillögurétt án atkvæðisréttar. Á aðalfundi skal einnig
kjósa tvo endurskoðendur og í nefndir félagsins.
4. gr.
Aðalfundur skal haldinn í marsmánuði ár hvert og boðaður
með minnst 4ra daga fyrirvara í Reykjavík og nágrenni.
Annars staðar á landinu með 8 daga fyrirvara. Í fundarboði
skal geta helstu mála er fyrir fundinum liggja t.d.
lagabreytinga. Fundur er lögmætur ef lagalega er til hans
boðað.
5. gr.
Fundir skulu haldnir þegar þörf krefur. Stjórnin skal boða
til fundar þegar þurfa þykir, einnig ef minnst tíu félagar
krefjast þess. Lögmætur er fundur sem er löglega boðaður.
Um boðun aukafunda gilda sömu reglur og um aðalfund.
6. gr.
Einfaldur meirihluti ræður úrslitum mála, annarra en lagabreytinga.
Til þess að lagabreytingar öðlist gildi, þarf 2/3
greiddra atkvæða lögmæts aðalfundar. Allar tillögur skulu
afhentar formanni skriflega.
7. gr.
Formaður skal boða til funda og stjórna þeim, eða skipa
fundarstjóra í sinn stað. Hann skal vinna að stefnumörkun
fyrir félagið og sjá um framkvæmd ákvarðana aðal- og
félagsfunda í samráði við stjórn. Varaformaður gegnir
störfum formanns í forföllum hans. Hann skal hafa eftirlit
með störfum hinna ýmsu nefnda félagsins og vera tengiliður
þeirra við stjórn. Ritari skal færa bók um allt það, sem
gerist á fundum félagsins og stjórnar og lesa upp fundargerð
í upphafi næsta fundar. Enn fremur rita bréf félagsins
í samráði við formann. Gjaldkeri skal sjá um varðveislu
sjóða félagsins í samráði við stjórn og skal vera ábyrgur
fyrir greiðslu reikninga þess. Meðstjórnandi starfar að
öllum tilfallandi málum er þurfa þykir með öðrum stjórnarmönnum
og tekur sæti þeirra í forföllum þeirra, eftir
ákvörðun stjórnar.
8. gr.
Stjórnin skal halda meðlimaskrá og færa inn á hana alla
nýja félaga. Þeir einir geta orðið félagsmenn, sem meirihluti
lögmætis félagsfundar samflykkir ef þeir;
1. eru meistarar í iðninni,
2. hafa sveinspróf,
3. hafa löglegt iðnbréf.
9. gr.
Sá sem óskar upptöku í félagið, sendir stjórninni skriflega
ósk um það og sækir um á þar til gerðum umsóknareyðublöðum
sem leggist fyrir næsta félagsfund til samþykktar.
Skal umsókninni fylgja meðmæli tveggja félagsmanna. Sé
umsækjandi samþykktur öðlast hann félagsréttindi þegar
á sama fundi. Umsækjandi greiðir ekki félagsgjald fyrir
fyrsta ár sitt í félaginu.
10. gr.
Heiðursfélaga getur félagið valið sér ef ástæður þykja til.
Þeir eru ekki gjaldskyldir og þurfa ekki að taka neitt starf
í félaginu, fremur en þeir vilja sjálfir, en hafa öll réttindi
sem aðrir félagsmenn.
11. gr.
Félagsmönnum er skylt að stimpla smíðisgripi sína með
nafnstimpli (eigin, meistara eða fyrirtækis) auk silfur eða
gullstimpils. Nýir og eldri stimplar skulu skráðir hjá
Neytendastofu og skal stjórnin halda spjaldskrá um þá
stimpla sem notaðir eru.
12. gr.
Innan félagsins skal starfa siðanefnd. Nefnd þessa skipi
formaður félagsins, formaður prófnefndar og formaður
markaðsnefndar. Starfssvið nefndarinnar skal vera að
kanna aga- og lögbrot félagsmanna ef einhver yrðu, vega
þau og meta og gefa út útskurð ef þurfa þykir. Nefndin
skal vera sáttanefnd milli félagsmanna í málum er upp
kunna að koma, og gera athugasemdir við óréttmæta
verslunarhætti. Jafnframt skal nefnd þessi vera dómnefnd
sé eftir því leitað af félagsmanni eða neytanda. Nefndin
kemur fram sem mats- og umsagnaraðili fyrir hönd félagsmanns
í opinberum málum, sé eftir því leitað.
13. gr.
Markaðsnefnd skal kosin á aðalfundi. Hana skipa þrír
félagsmenn. Nefndin skal marka stefnu til framtíðar í
markaðs- og auglýsingamálum. Nefndin starfar sjálfstætt
en í samvinnu við stjórn F.Í.G. og Samtök iðnaðarins
þegar þurfa þykir.
14. gr.
Enginn má skorast undan að taka að sér störf fyrir félagið,
nema gildar og rökstuddar ástæður liggi fyrir.
15. gr.
Árstillag skal ákveða á aðalfundi fyrir hvert komandi ár.
Allir félagsmenn skulu vera skuldlausir fyrir aðalfund
ella missa þeir atkvæðisrétt og kjörgengi næsta ár. Skuldi
félagsmaður tveggja ára tillag skal hann settur á aukaskrá
og fær ekki full réttindi nema hann greiði skuld sína að
fullu.
Félagsmenn sem náð hafa 70 ára aldri, eru undanskildir
árstillagskvöð.
16. gr.
Reglur um félagsmerki:
1. Félagið sjálft og einstakir félagsmenn mega
einir nota merki félagsins í rekstri sínum.
2. Félagsmerkið skal notað á þennan hátt:
a) sem auðkenni á verkstæði og verslanir
félagsmanna,
b) sem auðkenni á umbúðir þær, sem
félagsmenn nota í fyrirtækjum sínum,
c) sem auðkenni á bréfsefni, gjafakort og
annars konar eyðublöð,
d) sem auðkenni í auglýsingum félagsmanna
í blöðum og sjónvarpi.
3. Öll myndmót sem gerð eru af merkinu skulu
vera í eigu félagsins, en félagsstjórn skal lána
einstökum félagsmönnum mótin,
eftir því sem þörf er á.
17. gr.
Brot á lögum og samþykktum félagsins skal kært til
stjórnar sem getur síðan vísað málinu til siðanefndar til
umsagnar.
Brottrekstur úr félaginu skal leggjast fyrir næsta félagsfund
og því aðeins löglegur að 3/4 hlutar greiddra atkvæða
samþykki það. Úrsögn úr félaginu sendist stjórninni.
18. gr.
Leysist félagið upp, skal sjóður þess renna til líknarmála.
19. gr.
Með lögum þessum falla úr gildi öll eldri lög félagsins.
Reykjavík 20. mars 2004